Fr. Rosario Oliveira

DEV SONDEXKARAM: BHORVOXEACHIM YATREKARAM:

    Ami Utsovik Vorsacha modekot asanv ani hea Juna-chea mhoineak amchea Katedralachea Ulear ami “Dev Sondexkaram, Bhorvoxeachim Yatrekaram” hea matalleacher lokx ghaltanv. Hea mhoineak ami bhurgeak ani vaddloleank Igorjent ‘Doton’ suru kortanv. Sogllea sondexkaranim Jezu ani Dhormdutam bhaxen bhorvoxeachim yatrekaram zaunk goroz mhunn Povitr Sobha amkam xikoita.

1. JEZU, Dev-Sondexkar: Bhorvoxeacho Yatrekar: Jezu hea

    sonsarant ek yatrekar koso ailo, vattsur koso aplea payanim bhonvlo ani punorjivont zaun-Sorgar choddun apli Soddvonnechi yatra sompoili. Punn atam To amche yatrent sangat korta. Sonvsarant Apli yatra kortanam Jezu Apunn bore khobrecho Sondexkar mhunn spoxtt korta. Jedna To 12 vorsamcho aslo ani Dev mondirant fattim raulo tedna To budvontank, zanntteak ani dhormachea mukheliak “Doton’ xikoitalo. Soglle je Taka aikotale te ojeap zaun thottaktale (polle, Lk. 2: 41-48). Tea uprant To Aplea bapai - Juzek, ani avoi, Mariek, Aplea “dotonichea” kariacho ugddas korta kim Apunn Aplea Bapacho vaur kortam mhunn (polle, Lk. 2: 29). Jezuchea dotonicho “planner” amkam Lukachea xubhvortomanantuch mell’tta (polle, Lk. 4: 16-21). Tacho sondex aikotolim sogllim ojeap zatalim ani Tachea tonddantlim mannkulim utram aikun dadostalim (polle, Lk. 4: 22). Jezu veta thoim ‘doton’ xikoit ani borem korit ghelo (polle, D.I. 10: 38). Soglle suvater, sogllea vellar ani soglle poristitint, Jezun Apunn boro Sondexkar mhunn utramnim ani kornneamnim dakoilem. He soddvonneche yatrent Jezun soglieank bhorvoso dilo.

2. Dhormdut, Dev-sondexkar: Bhorvoxeache Yatrekar: Zoso

    Jezu, Bapacho Sondexkar zalo toxench dhormdut Jezuche sondexkar zale. Jezun tankam adnia dili, “Ak’khea sonvsarak vochat, soglle rochnnek Xubhvortoman porgottat. Bhavarth dhortit ani Povitr Snan ghetit tim soddvonn zoddtolim” (Mk. 16: 15-16). Povitr Atmo ghetlea uprant, te khoreponnim sogllea sonvsarak ghele ani Jezuchi ‘doton’ soglle porjek porgottunk lagle. Konn karannak lagun te Jezuche khore Sondexkar zaunk paule zait? Kiteak mhullear tannim, “Jezu Kristachea monant ani kallzant aslem tench” aplea “monant ani kallzant” dovorlem (Fil. 2: 5).

3. Leo XIV Pap Saib, Dev-sondexkar: Bhorvoxeacho Yatrekar:

    Maiache 08ver, Robert Cardinal Prevost, novo Pap Saib zauncho mhunn Devan tharailem. To Jezuche ani dhormdutamche suvater akhe Povitr Sobhek Dev-sondexkar zalo ani amam yatrekarank ek bhorvoxeacho foler mell’llo. Tachi ‘doton’ ani Xubh sondex fuddlea disamnim amkam odik spoxtt zatolo.

4. Firgojechim Dev-sondexkaram: Bhorvoxeachim Yatrekaram:

    Jezuchem mon ani kalliz ghevun zoxe dhormdut, Tache sondexkar zale, toxench frigojechea sondexkaramnim korunk favo. Padr Vigarachea margdorxonna khal, aplea hatant ghatlolea bhurgeank ani akhe Kristi porjek tannim Xubh khobor porgottun, sangatan vatt cholun, sohobhageliponnan vavrun ani Jezuchem missanv aplem korun sangati-yatrekarancho bhavarth ghott korunk, mogan jieunk xikounk ani bhorvoxeachi divtti sambhallunk vaurunk goroz. Hem apounnem jieunche adim tannim Devacho ormo aplea otmeant ani kallzant ghevunk nibel gorjechem (polle, Rom. 8:16). Tednam tim mhunnunk pautolim, “Hanv atam jietam to hanv nhoi; tor Krist mhoje thaim jieta” (Gal. 2:20).

5. Bhorvoxeachim Yatrekaram zaunk sondexkarank addkolli

    (Challenges): Sorgest Pap Saib, Francis, aplea poilea Apostolic Exhortation-ant, Evangelii Gaudium, 24 Nov. 2013, hea dakleant amkam ugddas korta kim ami sogllim Dev-sondexkaram. Punn kherit bhaxen Devan vinchun kaddloleam Sondexkaranim Jezu bhaxen zaunchem, Tachem mon ani kalliz apnnauchem ani Tachem missanv aplem korchem mhunn zagoita. Hea vaurant thoddeo addkolli (challenges) hanche vixim chotrai dourunk magta. Poile suvater, apsuvartponn ani otmik allsai (‘No to selfishness and spiritual sloth’ no. 81). Dusre suvater, otmik sonvsariponnantlim mekhllim ravunk magta (‘No to spiritual worldliness no. 93). Thoddim zannam sonvsari man, voddponn, ani xabaski zoddunk mhunn otmik vaur kortat. Tisre suvater, sondexkaramnim apnnam modem bhed-bhav vo zogddim korunk favo nam mhunnn sangta (‘No to warring among ourselves’ no. 98).     Alexandriachea Bhagevont Katarin, amkam Xubhvortoman porgottchea misavant ani yatrent, bhorvoxeachim Sondexkaram kor!